Omubaka amiziddwa ebigambo,ayogedde ku Bbomu

Omukubiriza w’Etteeserezo ly’eggwanga Anita Among,awalirizza omubaka akiikirira ab’obuvanjuba bw’ekibuga Soroti Jonathan Ebwalu okusaabulula kyabadde ayogedde bwabuuzizza lwaki obweraliikirivu bwa Bbomu buviiriddeyo mu kiseera ng’eggwanga lirimu Omuyaga gw’eby’obufuzi.

Musajjamukulu oyo okuvaayo bwatyo kiddiridde Omukubiriza kennyini okwebaza poliisi y’eggwanga olw’omulimu amakula gweyakola bweyategulula Bbomu egambibwa okusangibwa ku Kkanisa eyatuumwa Miracle Centre ey’Omusumba Robert Kayanja.

Wabula Omubaka wa Munisipaali ye Kira mu Tteeserezo lyerimu Ibrahim Ssemujju Nganda ku nsonga eo agambye nti Omukubiriza Anita Among tabadde mwenkanya bwalemesezza omubaka okuggyayo ensongaye obulungi nga waliwo ba Generaali mu magye abaalwana mu lutalo olwaleeta NRM mu buyinza abeewandiikanako mu butabo nga bwe baasuulanga Bomu mu lutalo olwatandika mu 1980 lumale luggwe mu 1986.

Kinajjukirwa nti mu ggandaalo eriwedde Bomu yategululwa ku kkanisa y’Omusumba Kayanja wano mu Lubaga ate n’endala n’etegululwa mu kifo abakyala abalejjesa aka Kyagera e Nateete weboolesereza obukaba ekimanyiddwa nga Mabiito.Mu kiseera kino bannayuganda abagoberera amawulire n’eby’obufuzi bamanyi bulungi nti Ssenkaggale wa National Unity Platform Robert Kyagulanyi Ssentamu atalaaga ggwanga nga yonna gyayitira enkungaanaze zijjumbirwa bannayuganda.

Ye Robert Kyagulanyi Ssentamu mu nkungaana ze zimu zazze akuba yasabye Gavumenti eggye abaserikale b’eggye ly’eggwanga erya UPDF ku mazzi g’ennyanja Nalubaale kwe bagambibwa okutulugunyiriza abavubi n’abalunnyanja abalala.Kyagulanyi Ssentamu yasinzidde Mayuge mu Buvanjuba bw’eggwanga lino mu kwogerako eri abawagizi be n’agamba nti abaserikale bano yonna gyebaweererezzaako ku mazzi ebbanga ery’emyaka etaano egiyise bakola gwa kutulugunya na kumalako ddembe bavubi teri kirala.