Olukungaana lwa FDC e Mbale lugudde Butaka

Poliisi eyungudde basajja baayo abampi nábawanvu nébayiwa ku kibangirizi kyé Mpummudde ekisangibwa mu district ye Mbale nékigendererwa ekiremesa olukungaana lwa bannakibiina kya FDC olwémyaka 15 lwebataakuza gyebuvuddeko ne basalawo balukuze leero.Bannakibiina kino baali baakukuza lunaku luno nga 6th omwezi oguwedde nébikujjuko mu kisaawe e Namboole bannakibiina kino eruuyi eyo olwóbungi bwabwe ne basalwo bakuze olunaku luno leero.

Ssekamwa wa poliisi mu ttundutundu lyénsozi za Elgon Robert Tukei ategeezezza nti abakulu bano baawandiikira Ssaabapoliisi wa kuno nga bamusaba olukusa nátabaanukula.Bo bannakibiina kino bagamba nti baawandiikira nábakulembeze aba wansi omuli námyuka Town Clerk wa Mbale Martin Busiku nábakkiriza okukozesa ekibangirizi ekyo.

FDC ewera , twagala ntebe

Bya Moses Kidandi
Bannakibiina kya FDC batenderezza ekibiina kyabwe kati ekiwezezza emyaka 15 bukyanga kitandikibwawo.Ababaka mu Tteeserezo ly’eggwanga bannakibiina kino beerayiridde okwongera okukitwala mu maaso okutuusa nga kikutte Enkasi y’eggwanga.

Ekibiina kino ekyatandikibwawo abantu abasatu okwali Ret Col Dr Kiiza Besigye,Chapa Karuhanga ne Augustine Ruzindana kivuganyizza ku ntebe y’obukulembeze bw’eggwanga emirundi egiweze ng’entebe bagikiremeza watono ddala Omuganda weyagereesa awaalema Ekkere okubuuka.

Ret Col Dr Kiiza Besigye asinzidde mu nteekateeka yeemu ne yeerayirira obutalituula ntende okutuusa ng’obukulembeze bw’eggwanga bulungamiziddwa ku lw’emirembe eri bannayuganda awamu n’okweyagalira mu nsi yaabwe.

FDC EVUMIRIDDE EKY’OKUDDAMU OKUKWATA MUMBERE

Forum for Democratic Change etegeezezza nti kikyamunnyo poliisi ya Uganda okuzannyiranga ku ddembe lya bannayuganda abakwatibwa buli lukya ate ne bateebwa mu ddakiika obudakiika ne nebaddamu okukwatibwa.

Ssekamwa w’ekibiina kino Ibrahim Ssemujju Nganda ategeezezza nti kyali kikyamunnyo Omusinga wa Rwenzururu ouddamu okukwatibwa nga y’akateebwa.Ssemuju Nganda ategeezezza nti kino kyalagira ddala nti poliisi tewa kkooti kitiibwa.

Kinajjukirwa nti Omusinga ku lw’okutaano lwa ssabbiiti ewedde yateebwa ku kakalu ka kkooti wabula nga tannagwa na mu kafuba ka baamweyimirira mbuga n’addamu okukwatibwa.

Kivvuunuddwa Charles Kizindo

 

OKUSABA KU KITEBE KYA FDC KUVUMIRIDDE EBYALI E KASESE

Bannaddiini bavumiriddennyo ettemu eryakolwa ku bataka be Kasese mu ggandaalo lya ssabbiiti ewedde.

Pastor David Ngabo ow’olulango mu kukulemberamu okusaba ku kitebe kya FDC e Najjanankumbi ategeezezza nti okukozesanga emmundu mu kwanganga bannansi abatalina mmundu kikolwa kikyamunnyo era ssikyekyali kyetaagisa.

Obubaka bwebumu era bwebwogeddwa Sheikh Issa Katende ng’ono ategeezezza nti kino kyali kikolwa kyakutiisatiisa bataka na kubamalako ddembe lyabwe.

Ono ategeezezza nti lino ssiryeryali eddagala eryetaagisa mu nsonga eno kubanga ekyakolwa kiseesabuseesa mu bikolwa bya kuwooleraggwanga.

Kinajjukirwa nti endooliito zino zaatandika lwakuna lwa ssabbiiti eri nezisajjuka mu ggandaalo ng’abantu abasuubirwa okusukka mu kikumi baagenda ezzirakumwa.

Kivvuunuddwa Charles Kizindo

Photo: NBS Tweeter

ABAANAAYANIRIZA BESIGYE BALABUDDWA,BANDIKWATIBWA

Poliisi mu Kampala erabudde bannabyabufuzi naddala abali ku luuyi oluwabula Gov’t ya kuno abaneetantala okweyiwa mu nguudo n’okukumba mbu nga baaniriza munywanyi waabwe Ret Col Dr Kiiza Besigye ng’akomawo okuva e bunaayira ku lw’okuna lwa ssabbiiti eno nti anaakwatibwako kaakumujjuutuka.

Bwayogeddeko ne bannamawulire,Ssekamwa wa poliisi mu ggwanga Andrew Felix Kaweesi ategeezezza nti bafunye amawulire nti bannakibiina kya FDC baagala kukumba nga baaniriza Besigye kyagambye nti ssibaakukikkiriza wadde okukkiriza omuntu yenna okusimba ku mabbali ga mwasanjala wa Ntebbe mbu bamulindirira.

Wabula bo bannakibiina kino bagamba nti ssibeetegefu kukyusa mu nteekateeka zaabwe nga Ssentebe waakyo mu Buvanjuba bw’eggwanga Wafula Oguttu ategeezezza nti baawandiikiradda poliisi nebagitegeezaako nga kyebalindirira bkuumi bwayo ku olwo na kubabuulira bwebaneeyambisa mwasanjala ono.

Kivvuunuddwa Charles Kizindo

Photo: www.aljazeera.com

ENTALO MU FDC ZAAKWONGERA EKIBIINA AMAANYI  

Omu ku bannamateeka abatutumufu mu kibuga Kampala era omu ku babanguzi ba bannamateeka mu Ssettendekero wa Makerere Richard Kirunda ategeezeza nti entalo n’okulumagana okuwulirwa mu kibiina kya FDC ensangi zino kamu ku bubonero obulaga ekibiina ekiramu era za mugasonnyo.

Waliwo amawulire agasaasaana nga galaga nti waliwo embiranye mu bakungu b’ekibiina kino waggulu mu kulonda bannakibiina abanajjuza ebifo ebikalu ku kakiiko kaakyo ak’okuntikko nga wano Kirunda waasinzidden’ategeeza nti kyamazima ddala ekibiina kyonna kitambulira ku demokulaasiya bino tebibulamu nti ate okulumagana kuno kwongera kunyweza kibiina.

Kivvuunuddwa Charles Kizindo

 

TURINAWE NE BANNE BAKWATIDDWA

Ssaabakunzi wa bannakibiina kya FDC omu ku bakyala abatanyigirwa mu nnoga Ingrid Turinawe akwatiddwa bweyabadde yaakava ku kkooti e Nakawa omwagalwa w’abangi Ret Col Dr Kiiza Besigye gyasimbiddwa mu maaso g’omulamuzi James Eremye Mawanda n’asomerwa emisango egyamuggulwako Gov’t ya kuno.

Turinawe yakwatiddwa wamu ne bannakibiina kya FDC abalala bwebabadde batambuza ebigere nga bava ku kkooti e Nakawa nga badda ku Spear motors.

Siraje Bakaleke aduumira poliisi mu Bukiikaddyo bwa Kampala ategeezezza nti bano batwaliddwa ku poliisi ya Kiira Road nga kitegeezeddwa nti baakusimbwa mu mbuga bavunaanwe ogw’okutambuza ebigere mu ngeri y’okulaga obutali bumativu bwabwe.


PHOTO: www.youtube.com

GAVUMENTI ESIMBIRA FDC KKUULI MU BYONNA

Eby’okwerinda byongeddwamu amanyi okuliraana n’enguudo zonna ezidda ku kkooti etaputa Ssemateeka w’eggwanga wakati mu kulindirira okuwulira okwemulugunya okwatwalwa embuga Ssaabawolereza wa Gov’t a kuno bweyali asimbira ekkuuli enteekaeeka z’ekibiina kya FDC ezaali ez’okulaga obutali bumativu bwabwe mwebaagattanga n’okusaba.

Okujulira kuno kuwulirwa abalamuzi bataano nga bakulembeddwamu amyuka Ssaabalamuzi wa kuno Steven Kavuma n’abalala okuli Richard Butera,Chebroni Barishaki,Elizabeth Musoke ne Catherine Bamugemereirwe.

Ssaabawolereza wa Gov’t mu mpaabaye ayagala kkooti ewerere ddala enteekateeka zino ez’okulaga obutali bumativu bwabwe zebaakazaako Defiance Campaign omuli okusaba kwebaali baatekawo okwa buli ssabbiiti,okwegugunga mu ngeri yonna okwo ssaako obutaddiramu ddala kusaba kuddamu kwetegereza byava mu kulonda eby’akalulu k’obukulembeze bw’eggwanga.


PHOTO: www.africaworldnews.net

ABA FDC BATEEKATEEKA KUSALIRA GAVUMENTI AMAGEZI

Abakungu bannakibiina kya FDC beevumbye akafubo ku kitebe kyabwe e Najjanankumbi ku lwe Ntebbe balabe bwebagenda okwanganga ebyasaliddwawo abakungu ba Gov’t ebikwata ku kaweefube waabwe aw’okulaga obutali bumativu bwabwe.

Kinajjukirwa nti Gov’t eno olunaku olw’eggulo yalangiridde nti tewabaawo mukutu gwa byampuliziganya gwonna guddamu kuweereza butereevu nteekateeka za bannabibiina ebiri ku luuyi oluwabula Gov’t ya kuno okuli okusabiranga eggwanga,okutambuzanga ebigere nga balaga obutali bumativu bwabwe kwebaakazaako ‘One Million March Demonstration’,okwambalanga engoye enzirugavu n’okusigalanga awaka nebatagenda ku mirimu.

Amyuka Ssaabawandiisi mu kibiina kino Harold Kaija ategeezezza nti akafubo kano kakubirizibwa Ssenkaggale w’ekibiina kino Maj Gen Mugisha Muntu.


PHOTO: www.chimpreports.com

POLIISI E ETEEVUNYA E NAJJANANKUMBI

Ab’ebyokwerinda ku kitebe ky’ekibiina kya FDC bateevunya okukira obuwuka wakati mu kulinnya eggere mu nteekateeka ya bannakibiina ebaddewo olwa leero ey’okutambula nga basinziira ku kitebe kino bajje mu masekkati ga Kampala bagumbe ku ssomero lya Nakivubo Blue PS nga baagala wateekebwewo okwetegereza okw’enjawulo mu byava mu kalulu k’omukulembeze w’eggwanga akaakubwa omwaka guno gwennyini mu mwezi gwa Mukutulansanja Ogw’okubiri Yoweri Kaguta Museveni amale alangirirwe ku buwanguzi bano kyebawakanya nga bagamba nti omuntu waabwe akalulu kano ye yakawangula.


PHOTO: Harold Kaija