Agaanye bba okutunda ppoloti asasule bbanja ne yeetuga

Nnamwandu w’omusajja ow’emyaka amakumi 56 eyeetuze olw’ebbanja ery’emitwalo amakumi ataano ategeerekese nga Nyiraguhirwa Ancilla ,awakanyizza ebyogeddwa nti bba yeetuze lwakumulemesa kutunda katundu ku ppolotiye e Kisoro asasule ebbanja erimubadde mu bulago.

Omulambo gwa musajjamukulu Pereza Ponsiano abadde omutuuze ku kyalo Kabaya mu district eye Kisoro gusangiddwa gulengejjera ku muti gwa Woovakkedo emmanju w’enjuuye nga Ssekamwa wa poliisi eruuyi eyo Elly Maate agamba nti musajjamukulu oyo yeeyambisizza katimba ka nsiri buno obwagabwa ne yeggya mu bulamu.Baliraanwa baabwe bategeezezza nti ono abadde n’ebbanja lya ka SACCO ak’omu kitundu lya mitwalo ataano atenga mukyalawe amuganye okusala ku kafo kaabwe yeetaase.

Omukulu w’essomero asobezza ku we 15 akwatiddwa

Poliisi ye Semuto mu Nakaseke ekutte omukulu w’essomero lya Gov’t agambibwa okutuuza kaanakawala akabadde kasoma eky’okutaano ku Ssessiriiza.Ono ategeerekesenga Kayondo Claudio mutuuze ku kyalo Miginje eky’omu Muluka gwe Miginje mu ggombolola ye Semuto e Nakaseke ng’abadde mukulu wa ssomero lya St Denis Kijaguzo PS okumala ekiseera wabula n’akyusibwa n’addizibwa mu bitundu bye Ngoma era mu Nakaseke.

Omu ku batuuze abakulembeddemu enteekateeka z’okuwenja n’okukwata omusajja ono Nnakyewa mu nsonga z’eby’abaana n’amaka omu ku baabangulibwa ekibiina ky’obwannakyewa ekya CORDI Maayimuuna Sserunjogi amanyiddwa nga Maama Sseeki atutegeezezza nti Kayondo akwatiddwa bwabadde agenze ewaabwe w’omuwala yeegayirire bazaddebe babeeko engeri gyebakwataganya ensonga baleme kuzitwala mu ba buyinza.Ono agamba nti akwatiddwa ku kyalo Makaayi era ekisangibwa mu kitundu kye kimu awali n’ennimimiroye gyeyakwatidde omwana ng’amulimbalimba emiyembe egyabaddeyo.

Akalulu ka 2021 kagenze ku mitimbagano, teri kakuyege

Enkungaana za Kakuyege eri baneesimbawo ku bifo eby’enjawulo mu kalulu akalindwa omwaka ogujja 2021 ziggyiddwawo olw’ekirwadde ekyatuzinda.Bwabadde afulumya nnamutayiika w’enteekateeka z’akalulu akabadde katandise okwogeza bannayuganda ebikankana,Ssentebe w’akakiiko k’eby’okulonda Simon Byabakama ategeezezza nti okusinziira ku biragiro ebizzenga biyisibwa ministry y’eby’obulamu mu kutangira ensaasaana y’ekirwadde kya COVID 19 bannayuganda baawerwa okuddamu okukungananga ate n’okuliraananga mu bifo eby’olukale ekimu ku biragiro bye batayinza kuyisaamu maaso.

Byabakama ategeezezza nti enteekateeka za kalulu kano zitandika n’omwezi guno mwetuli ogw’omukaaga okutuusa mu gw’okubiri omwaka ogujja 2021 okulonda kwonna lwekunaabaawo.Abaneegwanyiza okukiikirira ebitundu eby’enjawulo mu Tteeserezo ly’eggwanga ne Gov’t ez’ebitundu baakusunsulwa wakati w’omwezi ogw’omwenda n’ogw’ekkumi omwaka guno,mu gw’omwenda abaneegwanyiza obukulembeze bw’eggwanga basunsulwe ate kakuyege waabwe bonna abeere wakati w’ennaku z’omwezi 20th ogw’ekkumi okutuusa nga 8th omwezi ogw’olubereberye omwaka ogujja 2021 olwo okulonda kubeerewo wakati w’ennaku z’omwezi 10th ogw’olubereberye okutuusa nga 8th ogw’okubiri.

Ebikajjo bisse babiri

Poliisi ye Lugazi etandikiddewo okunonyereza ku kituufu ekiyinza okuba nga kye kivuddeko akabenje akafiiriddemu abantu babairi mu Mabira ku mwasanjala wa Kampala-Jinja enkya ya leero mmotoka y’ekika kya Harrier bweyingiridde bwenyi ku bwenyi Fuso ebadde ekubyeko ennyanya ezigambibwa okuba nga zibadde zitwalibwa Kenya.

Aduumira poliisi y’ebidduka mu ttundutundu eryetoolodde omugga Ssezzibwa Israel Wambesyo ategeezezza nti omugoba wa mmotoka ya Harrier etabaddeeko Number ebadde egezaako kuyisa ntuumu ya bikajjo ebibadde biyiise wakati mu kkubo mu butanwa n’eyingirira Fuso y’ennyanya ebadde edda e Kisumu mu Kenya.Wambesyo agambye nti abafudde ye Shariff Musenero abadde avuga Harrier ne Nakakande Samalie owe Busunju ng’emirambo gitwaliddwa mu ggwanika ly’eddwaliro e Lugazi.

Minister Tumwine ajjukidde ab’amawulire

Bannamawulire mu ggwanga ddaaki bajjukiddwa minister avunanyizibwa ku butebenkevu mu ggwanga Gen Elly Tumwine bwakutte mu ka Waliggo n’aggyamu ejjamba lye yeeyambisizza okubagulira Masks ezibikkwa ku mimwa n’ennyindo.

Ono asinzidde ku Ssengejjero ly’amawulire wano mu Kampala n’ategeeza nti bannamawulire abalaba ntakera nga balagajjalira obulamu bwe batanula okugawenja wano na wali wabula nga tebeetangidde n’agamba nti ate nga be basaanidde okubeera abasaale mu kulaga ensi ekisaanidde okukolwa okusinga okutegeezanga abantu abalala nga bo beeyitira batyo.

Kinajjukirwa nti mu kwogera kw’omukulembeze w’eggwanga okukyasembyeyo ku kirwadde ekyo yategeeza nti mu kwetangira kawenkene w’ekirwadde ffenna ennyindo n’emimwa tetusaanidde kubirekanga bweru anti okwerinda baalugera tebuba butyi.

Abagoba ba taxi ne bodaboda bagumiziddwa ku kya ppaaka enkadde

Eyagira ng’atuuziddwa mu ntebe ya Ssenkulu w’ekitongole ekiddukanya ekibuga Kampala Yinginiya Andrew Kitaka asabye abagoba ba Taxi n’aba Boda Boda obutawuliriza bibungeesebwa ba mimwa mpewere ku nteekateeka z’okuddaabiriza ppaaka ya taxi enkadde nga bwekugendereddwamu okubasindiikiriza n’okubagobera ddala mu kibuga Kampala.Yinginiya Kitaka agambye nti baasalawo enteekateeka eno eggyibweko Akawuuwo ng’eggwanga likyali mu kituulawaka kikendeeze ku ntataaganya ezzenga ebaawo buli lwewabaawo okuddaabiriza n’okulongoosa ng’eno abantu bwe bakola egyabwe.

Ono agambye nti enteekateeka ya bulungi bwa buli muntu eyeeyambisa entambula ey’olukale ng’omulimu bwegunaggwa bonna ababaddenga bagikoleramu baakukkirizibwa okuddamu bakakkalabye.Kinajjukirwa nti poliisi olwajjo yayungudde basajja baayo abawerako n’ebayiwa mu ppaaka eno mu kugezaako okulemesa abagoba ba taxi abaabadde baagala okusimbira omulimu ekkuuli.

Omuwendo gw’abafiridde mu kalinaabiri gweyongedde bali 11

Omuntu omulala omu nga mulamu aggyiddwa mu bitoffaali by’ekizimbe ki Kalinaabiri eky’emyaliiro ena ekyabumbulukuse ne kigwiira abazimbi mu ggandaalo lyetwakamalako wano e Kansanga mu Zone emanyiddwa nga Kiwempe.

Omu ku bagatusakira wano mu Kampala Robert Ssegawa atuuse ku kizimbe kino enkya ya leero atutegeezezza nti bateebereza abantu abalala nga munaana bateeberezebwa okuba nga bakyalemedde mu bitoffaali by’ekizimbe ekyo.Wetujjidde ku mpewo ng’emirambo emirala ebiri gye giziikuddwa okuva mu kisassalala ky’ekizimbe ekyo.

Emirambo wetwogerera giweze 11 n’abalamu 3 be baakaggyibwayo.

Tumukunde alya butaala, yeeyimiriddwa obukadde 50

Munnamagye eyagannyuka eyeevaamu ng’enkoko emira Ensanafu n’atunuulira entebe ennene mu ggwanga n’eriiso erigyegomba Lt Gen Henry Tumukunde ddaaki ayimbuddwa ku kakalu ka kkooti ka Bukadde amakumi ataano obutabadde bwa buliwo bwakkiriziddwa okweyimirirwa.

Tumunde ng’ayimbuddwa omulamuzi wa kkooti enkulu Wilson Kwesiga abadde mu Kawome e Luzira okuva nga 18th omwezi ogw’okusatu omwaka guno kkooti ekkirizza n’eddamu okwetegereza ku bukwakkulizo bweyali ateereddwawo jjuuzi lweyasembayo okuleetebwa.

Omulamuzi Kwesiga akkirizza abamweyimiridde okubadde mukyalawe Stella Tumunde,mukoddomiwe Hannington Karuhanga ne mukwano gwabwe Mathew Rukikaire.Tumukunde yakwatibwa gyebuvuddeko n’alangwa ogw’okusangwa n’emmundu mu ngeri emenya amateeka.

Tumukunde asabye asibwe n’abasibe abalala

Munnamagye eyagannyuka Lt Gen Henry Tumukunde eyeevaamu ng’enkoko emira Ensanafu n’asonga ku ntebe ennene mu ggwanaga amale akwatibwe aggalirwe e Luzira alaze obwennyamivu ku ngeri gyakuumirwamu mu bwannamunigina mu Kawome gyali kyagambye nti kimumalirako ddala egya Nnakakaawa.Tumunde eyaggulwako ogw’okulya mu nsiiye olukwe n’okusangwa n’emmundu mu bumenyi bw’amateeka aleeteddwa ku lutimbe mu nkola empya eyagunjibwawo mu maaso g’omulamuzi wa kkooti ya City Hall Valeria Tuhimbise n’avumirira eky’okusibwa mu bwannamunigina gyoli ye musibe yekka ali e Luzira nti ate n’okummibwa olukusa olulaba abantube n’omusawowe kimumenya okukira eyeetisse Olubengo.

Mu birala byayogeddeko ebimunyiga Tumukunde agambye nti omuntu omulamu atakkirizibwa kukyusa ngoye ng’aleetebwa mu kkooti n’alabika nga bwazzenga alabika kikyamu nnyo era kirinnyirira eddembe erimuweebwa Ssemateeka.Omukulu ono alagiddwa addizibwe embuga nga 20th ppuliidawe n’aweebwa ga buwa addemu asabe olukusa olw’omuntuwe okweyimirirwa ensonga zitunulwemu nga 20th lwanaddizibwa.

Museveni ayogedde ku bafiira ebweru,baziikweyo

Bannayuganda ekirwadde kya COVID 19 bekinattiranga ebunaayira baakuziikwanga eyo awatali kubazza ku butaka.Mu kwogera kwa Kabwejungira Museveni akawungeezi akayise ategeezezza nti mpaawo bisigalira bya munnayuganda binakkirizibwanga kuddizibwa kuno ssinga kinaakakasibwanga ng’afudde bulwadde buno engeri obuwuka obukireeta gyebusigala nga bulamu okumala ekiseera ku mubiri gw’omuntu abeera afudde obulwadde obwo ssaako ennono zaffe wano ez’okwesembereza ennyo bannaffe ababa bavudde mu bulamu.Omukulu agambye nti na wano mu ggwanga ssinga kanaatandanga omuntu n’afa olw’obulwadde buno kyagambye nti asaba aleme kukiwulira, omulambo gunaazikwanga eyo awatali kugutambuza kwongera kusaasaana kwakyo.

Museveni asiimye ab’eby’obulamu abasawo n’ababeezi baabwe abakoze omulimu amakula mu kaweefube w’okujjanjaba abalwadde bano n’okusingira ddala abaasookerwako ng’ekirwadde kyakatuzinda era nga tewaali kweteekateeka kwonna wabula ne bakola kyebaasobola.Mu kwogera kuno okw’omulundi ogw’ekkumi n’esatu Kabwejungira asabye abavunanyizibwa ku by’emisaala obutalonzalonza bongeze bannassaayansi ensako n’emisaala olw’emirimu amtendo gye bakolera eggwanga n’awa eky’okulabirako ky’mbeera y’obulwadde buno obwatuzinda nti bakozenga butaweera buli kaddde okunonyereza.

Zo pikipiki n’obugaali Museveni alagidde zongerweko obudde zikomenga okutambula ku ssaawa kkumi n’emu ez’akawungeezi sso ssi munaana nga bweyali agambye mu kwogera okw’omulundi ogw’ekkumi n’ebiei.Omukulu ono ategeezezza nti okutangira abagoba ba pikipiki zino okutambula baakigendereramu kubaziyiza kutambula kiro ekyalyongedde emikisa gy’ekirwadde okusasaana.Bo abanaabeeranga mu mmotoka ezisaabaza eby’amaguzi nabo bakendeezeddwa okuva ku bantu abasatu nga bwekyali kyalangirirwa ne baddizibwa ku muntu omu era mu kaweefube y’omu.

Museveni yeeweredde okutandika okuyingizanga emmere okuva mu mawanga ag’ebunaayira ssinga kanaatanda abaguza Gov’t emmere omuli obuwunga n’ebijanjaalo okwongera okuduumuula emiwendo gyayo.Omukulu ategeezezza nti bannayuganda babadde batandikidde ddala okweyambisa omukisa gw’ekizibu ekyatuzinda nga balinnyisizza emiwendo gy’obuwunga n’ebijanjaalo beeyoolere omudidi mu kubiguza woofiisi ya Ssaabaminister kyavumiridde n’agamba nti ajja kuwalirizibwa okugigula ebunaayira waakiri ku ssente entono okusinga bannansi okunyaga eggwanga lyabwe obutereevu.