ABAAWAGIRA MUSEVENI BAGOBEDDWA KU TTAKA LY’EBIBIRA

Abataka abasoba mu bikumi 300 ababadde bawangaalira ku kitundu ky’ettaka ly’ebibira erisangibwa ku kyalo Mbale mu ggombolola ye Butuntumula mu district eye Luweero ge bakaaba gebakomba oluvannyuma lwa poliisi leero okumalirira okubasengula ku ttaka eriwerako yiika ebikumi 200 kwebabadde ebbanga erisukka mu myaka amakumi ataano.

Ow’eby’okwerinda ku kyalo kino Kabira Wilson ategeezezza nti poliisi eyiiriddwa olwa leero erabika egendereddwamu kubagobera ddala ssonga ettaka lyonna babadde tebalikozesa wabula baliko katundu butundu ke babadde bakolerako n’okuwangaalirako.Kinajjukirwa nti Omubaka omukyala owa Luweero Yinginiya Lilian Nakate Sseggujja yasabye abataka bano okuguminkirizibwa baleke kusindiikirizibwa ng’abatali kwabwe baveeko nga bamalirizza okukungula ebirime byabwe.

GAVUMENTI YEESAMBYE EBY’OKUSASULIRA OBUJJANJABI BWA BOBI WINE NE ZAAKE

Ministry y’eby’obulamu esambazze ebibadde bigambibwa nti akakiiko k’eby’obulamu ke kaalwisa okutwalibwa kw’ababaka ababiri Robert Kyagulanyi ne munne Francis Zaake okujjanjabwa.Bwayogeddeko ne bannamawulire ku Ssengejjero lyago Minister w’eby’obulamu Dr Jane Ruth Aceng ategeezezza nti oluvannyuma lw’okwanguya kw’omubaka Kyagulanyi n’abantube okukkiriza okukeberebwa abasawo ba Gavumentit yayanguyirwa okutwalibwa ebunaayira okujjanjabwa wabula munne Zaake n’abantube baalwawo okusalawo okumukkiriza okukwatibwako abasawo ba Gov’t.

Aceng ategeezezza nti Omubaka Zaake yagenda okukkiriza okukeberebwa lwali lwa Mukaaga atenga abasawo baali bayingidde ggandaalo nga y’ensonga lwaki baamukeereddeko lwa Bbalaza n’akeberebwa era n’akwasibwa ab’eby’okwerinda nabo bamute agende nga bwegwabadde.

Minister Aceng wabula akakasizza nti Gavumenti tegenda kusasulira bujjanjabi bwa babaka bano olw’ensonga nti embeera mwebaali yali teyeetaaga kutwalibwa bunaayira wabula bo bennyini baayagala baweerezebweyo ob’olyawo bafune obujjanjabi bwe baayagadde sso ssi bwebaalibadde beetaaga okusobola okutereera obulungi.

 

 

BABU ATABUKIDDE MUSEVENI,WUMMULA

Eyaliko minister w’eby’amayumba n’enkulaakulana y’ebibuga Cap Francis Babu akakasizza nti Kabwejungira M7 akoze ekimala  nga kye kiseera entebe agikwase omuntu omulala.

Ono asinzidde ku lutimbe lwa Terefayina ya NBS emu ku z’amanyi mu ggwanga mu Kalasamayanzi akayise n’ategeeza nti kituufu Mwami Museveni aliko byakoledde eggwanga era bannayuganda tebali nga bweyabasanga wabula kyebayita Demokulaasiya kimukaluubiridde okussa mu nkola era ng’amawanga amalala bwekigalema abantu nebalondanga wabula okulonda ne kwetabikangamu ebitategeerekeka bulungi era abantu nebatakulemberwa be beerondedde mu mirembe.

NSSF EGABUDDE

Ekittavvu ky’abakozi mu ggwanga ekya NSSF kirangiridde amagoba ga bitundu 15% eri abakozi abateresi mukyo okuva n’olwa leero.Kino kirangiriddwa Minister Omubeezi ow’eby’ensimbi n’okuteekerateekera eggwanga Gabriel Ajedra mu lukungaana olw’enjawulo olutuuziddwa wano mu Kampala nga wetwogerera n’obubaka obukakasa abateresi ensimbi ze balinayo empya oluvannyuma lw’okukubisibwamu amagoba agalangiriddwa bwatandisedda okubatuukako nga buyita ku masimu ag’omu ngalo.

ABAANA ABABADDE BAWAMBIDDWA BALABISE

Poliisi mu ttundutundu lya Savanna ekakasizza okulabwa kw’abaana ababiri ababadde bawambiddwa okuva ku bazadde baabwe e Bukuuku ekisangibwa ku nsalo ya district ye Nakaseke ne Luweero.Ssekamwa wa poliisi mu ttundutundu lino Paul Kangavve ategeezezza nti wabula bakyawenja omusajja nnannyini ssimu eyabadde ekubira bazadde baabwe nga basabwa Ssente za Kantanyi ate abaana.Bano kuliko abadde atemera mu myaka 16 n’ow’emyaka Omusanvu.

Ku nsonga z’abasibe amakumi 46 abaayooleddwa jjo mu bbinu eryabaddewo nga bannaLuweero baaniriza Omubaka wa Kyaddondo East mu lukiiko lw’eggwanga olukulu Robert Kyagulanyi bweyabadde ayita mu bitundu bya Luweero.Kangavve agamba nti batandise okubasunsulamu balabe abazzi b’emisango kayingo bavunaanwe.

 

KAYIHURA ATEEREDDWA,TAAFULUMENGA KAMPALA NA WAKISO

Bya Charles Kizindo

Essanyu kata litte banywanyi b’eyaliko Ssaabapoliisi wa kuno Gen Kale Kayihura bw’akkiriziddwa okweyimirirwa mu kkooti y’amagye ekulirwa Lt Gen Andrew Gutti.Bwabadde amukkiriza okweyimirirwa,Omulamuzi Gutti ateereddewo Kayihura obukwakkulizo obuwera okuli obutakkirizibwa kufuluma district eya Kampala ne Wakiso ssaako okufulumanga eggwanga nga tafunye lukusa,okugendanga ku kkooti eno buli Bbalaza esooka mu mwezi nobulala.Kayihura ateereddwa ku kakalu ka Bukadde bwa wano kkumi obutabadde bwa buliwo na buli amweyimiridde Obukadde Butaano Butaano era obutabadde bwa buliwo.

Gyebuvuddeko Kkooti eno yakubyeko n’okubooga n’ebooga banywanyi,ab’oluganda,abako n’ab’emikwano gya Gen Kale Kayihura bwebazze okubaawo ng’abajulizi ng’omuntu waabwe asaba okweyimirirwa.Abamweyimiridde abasatu kuliko;Maj Gen James Mugira,Maj Gen Steven Kavuma n’omukyala Hon Rosemary Tumusiime nga bwe baamalirizza okuwaayo ebibakwatako Ssentebe wa kkooti eno Lt Gen Andrew Gutti yagiyimirizzaamu okumala essaawa emu ye ne banne basooke beegeyeemu.

Bannamateeka ba Kayihura nga bakulembeddwamu Peter Kabatsi mu nsonga ze batadde embuga mu kusabira omuntu waabwe okukkirizibwa okweyimirirwa mulimu eky’okukulirira mu myaka 62 gyalina,ey’obulamubwe obwetaaga omusawo nti ate ye ng’omuntu abadde Ssaabapoliisi okumala emyaka 13 tasobola kubuuka makkyo biragiro bya kkooti okwo ssaako okuba Ssemaka amanyiddwa obulungi gyabeera mu ggombolola ye Makindye ate alina obutaka e Nyakabande mu Kisoro.Kayihura yaggulwako emisango esatu okwali okulagajjalira eby’okulwanyisa ebyali mu mikonogye,okuwa abantu ba bulijjo emmundu mu ngeri emenya amateeka ssaako okuwamba,okubuzaawo n’okusindiikiriza bannansi ba Rwanda abaawangalira wano.

BOBI WINE NE BANNE BATEEREDDWA,KIRI BULALA E GULU

Essanyu likize okuttira abawagizi b’omubaka Robert Kyagulanyi Ssentamu ne Kassiano wadri wabweru wa kkooti enkulu e Gulu oluvannyuma lw’okufuna amawulire g’okuteebwa kwabwe.

Babaka bannaabwe abalala okuli Paul Mwiru n’abalala bonna bakkiriziddwa okweyimirirwa omulamuzi wa kkooti enkulu e Gulu. Bannamateeka baabwe nga bakulembeddwamu Abdul Katuntu basinze nnyo kwesigamya kusaba kwabwe ku mbeera y’obulamu bw’abasibe,abamu kubo abakulu mu myaka ssaako ebbeetu eribaweebwa Ssemateeka.

Bwebabadde bakkirizibwa okweyimirirwa omulamuzi akakasizza nti kituufu abantu be baleese okubeeyimirira bannayuganda abamanyiddwa obulungi era abasuubirwa obutalemererwa kubazza mbuga ssinga baba beetaagibwa.Oluuyi oluwaabi lusoose kusaba mulamuzi bannabyabufuzi bano abagaane okuddamu okwenyigira mu kutambula okulaga obutali bumativu bwabwe n’ebirala byonna ebiyinza okuyitwamu okukuma omuliro mu bantu.

Mu bateereeddwa Kassiano Wadri engeri gyali mubaka wa Arua abadde asuuliddwa emisanvu obutadda mu kitundu ky’akiikirira olw’okwewala okwongera okuseesa mu butabanguko wabula Omulamuzi wa kkooti eyo amulagidde buli lwanaabanga ayagala okutuukako mu balonzibe asookenga kufuna lukusa kuva mbuga okumala ebbanga lya myezi esatu.Bano balagiddwa basse emikono ku bukalu bwa Bukadde Butaano Butaano obutali bwa buliwo n’ababeeyimiridde Obukadde kkumi kkumi era obutabadde bwa buliwo.

Ye eyaliko omuduumizi w’eggye ly’eggwanga erya UPDF Gen Mugisha Muntu y’omu ku baggyeeyo obwenyi okweyimirira Omubaka wa Kyaddondo East mu lukiiko lw’eggwanga olukulu Robert Kyagulanyi abadde amaze akaseera mu mikono gy’ab’eby’okwerinda ne mu kkomera.

DR SHEILAH NDYANABANGI ASABIDDWA E NAKASERO

Enteekateeka z’okukusabira omwoyo gw’abadde akulira ekitongole ekirwanyisa ebirwadde by’emitwe ebiva ku kwekeserera ebiragalalagala Dr Sheilah Ndyanabangi mungu gweyajjululira wano mu ddwaliro ekkulu e Mulago zigenda bukwakku mu kkanisa ya All Saints wano e Nakasero n’oluvannyuma omubirigwe gugenda kutwalibwa e Kabale ku kyalo Kasheregyenyi gyagenda okugalamizibwa mu nnyumbaye ey’olubeerera ku ssaawa mukaaga ez’omuttundtu olunaku lw’enkya.

Ndyanabangi yafa lwamukaaga ng’ekimu ku bika bya kookolo ow’omu Nnabaana kye kyamunnyudde egy’ensi eno ekirwadde kyazzenga alwanyisa buli lukya n’okulwanirira bannayuganda baleme kukifuna.Bannamawulire abasaka ag’eby’obulamu wano mu ggwanga bagamba nti banaalwawo okufuna omusawo omukugu mu kisaawe ky’okulwanyisa ebiragalalagala nga Sheilah bwabadde abanguyira.

AMAGYE GEJJEEREZZA BOBI WINE,POLIISI EMUKUTTE

Omubaka Robert Kyagulanyi Ssentamu Bobi Wine aggyiddwako emisango gyonna gyabadde avunaanibwa mu kkooti y’amagye ebadde ekulembeddwamu Ssentebe waayo Gen Andrew Gutti.Ono ng’akiikirirwa bannamateekaabe abakulembeddwamu Omubaka Medard Lubega Sseggona baasbye kkooti eno emuggyeko emisango gino engeri gyewatabadde bukakafu bumala ng’ate ssi muserikale nga kale okumusimba mu maaso ga kkooti y’amagye kibadde kirinnyirira ddemberye.

Kyagulanyi bw’abadde tannaddamu kukwatibwa tutegeezeddwa nti bannaKampala n’okusingira ddala ewa Kisekka bajaganyizza byansusso oluvannyuma lw’amawulire ga mukwano gwabwe okuggyibwako emisango mu kkooti y’amagye okuwulirwa.Byo eby’okwerinda mu Gulu n’emiriraano biri ggulugulu nga poliisi n’amagye byatazaamye enguudo ezisinga mu kaweefube eyagendereddwamu okutebenkeza eddembe ssinga wabaddewo akagagambulabbwa konna akabalukawo.

BESIGYE AVUDDEYO KU BABAKA BAKUBE

Eyaliko Ssenkaggale w’ekibiina kya FDC Ret Col Dr Kiiza Besigye asizidde ku kitebe kyabwe ab’oluuyi oluwabula Gov’t ku luguudo lwa Katonga wano mu Kampala n’ategeeza nti aliko naye ekibinja kya bannamateeka ky’alonze kyegatte ku bannamateeka abaaweerezeddwa e Gulu bakwataganire wamu mu kaweefube w’okwanguyaako ensonga z’okuyimbula ababaka abaasibiddwa n’abatali mu mbeera nnungi mu nsonga z’obulamu bajjanjabwe ng’ekibinja kino kikulemberwa Erias Lukwago.Besigye alaze obwennyavu eri embeera egenda mu maaso mu ggwanga n’ategeeza nti kiragira ddala nti obufuzi obugoberera amateeka tebukyaliwo.