Ssemaka yeetuze lwa nnusu 1000 ez’omunnyo

Abatuuze ku kyalo Nyakabungo ekisangibwa mu Muluka gwe Rwene eky’omu ggombolola ye Buhara mu Kabale bazikubyemu makiikakiika mutuuze munnaabwe bweyeeyimbyemu omuguwa ne yetta bwalemereddwa okufuna shilling 1000 agulire ab’omu makaage ekitundu kya kkilo y’omunnyo.

Abatuuze ku kyalo kino bategeezezza nti munnaabwe ategeerekesenga Denis Micheal Owamani yafunyemu obutakkanya ne mukyalawe obwavudde ku kulemererwa okubagulira omunnyo ogw’okussa mu nva mukyalawe ng’amulangira nga bwatakyali musajja kimala bwaba tasobola kubagulira munnyo ogwa shilling 1000 lwokka.

Ssekamwa wa poliisi eruuyi eyo Elly Maate ategeezezza nti omusajja ono alabirizza mukyalawe ng’avuddeko awaka ne yeetugira ku mulabba mu ddiiro ly’ennyumba yaabwe.

Abagoba ba taxi ne bodaboda bagumiziddwa ku kya ppaaka enkadde

Eyagira ng’atuuziddwa mu ntebe ya Ssenkulu w’ekitongole ekiddukanya ekibuga Kampala Yinginiya Andrew Kitaka asabye abagoba ba Taxi n’aba Boda Boda obutawuliriza bibungeesebwa ba mimwa mpewere ku nteekateeka z’okuddaabiriza ppaaka ya taxi enkadde nga bwekugendereddwamu okubasindiikiriza n’okubagobera ddala mu kibuga Kampala.Yinginiya Kitaka agambye nti baasalawo enteekateeka eno eggyibweko Akawuuwo ng’eggwanga likyali mu kituulawaka kikendeeze ku ntataaganya ezzenga ebaawo buli lwewabaawo okuddaabiriza n’okulongoosa ng’eno abantu bwe bakola egyabwe.

Ono agambye nti enteekateeka ya bulungi bwa buli muntu eyeeyambisa entambula ey’olukale ng’omulimu bwegunaggwa bonna ababaddenga bagikoleramu baakukkirizibwa okuddamu bakakkalabye.Kinajjukirwa nti poliisi olwajjo yayungudde basajja baayo abawerako n’ebayiwa mu ppaaka eno mu kugezaako okulemesa abagoba ba taxi abaabadde baagala okusimbira omulimu ekkuuli.

Tumukunde alya butaala, yeeyimiriddwa obukadde 50

Munnamagye eyagannyuka eyeevaamu ng’enkoko emira Ensanafu n’atunuulira entebe ennene mu ggwanga n’eriiso erigyegomba Lt Gen Henry Tumukunde ddaaki ayimbuddwa ku kakalu ka kkooti ka Bukadde amakumi ataano obutabadde bwa buliwo bwakkiriziddwa okweyimirirwa.

Tumunde ng’ayimbuddwa omulamuzi wa kkooti enkulu Wilson Kwesiga abadde mu Kawome e Luzira okuva nga 18th omwezi ogw’okusatu omwaka guno kkooti ekkirizza n’eddamu okwetegereza ku bukwakkulizo bweyali ateereddwawo jjuuzi lweyasembayo okuleetebwa.

Omulamuzi Kwesiga akkirizza abamweyimiridde okubadde mukyalawe Stella Tumunde,mukoddomiwe Hannington Karuhanga ne mukwano gwabwe Mathew Rukikaire.Tumukunde yakwatibwa gyebuvuddeko n’alangwa ogw’okusangwa n’emmundu mu ngeri emenya amateeka.

Ekitongole ky’eby’omutindo kivuluze emmere egabwa

Ebitundu amakumi 28% eby’obuwunga n’amakumi 27% eby’ebijanjaalo ebibadde bigabirwako bannayuganda mu nteekateeka z’okuduukirirwa n’eky’okulya mu kiseera kino eky’ekituulawaka ekyafuuse Lutaakome bano bazzukulu ba Kayiira Gaajuule e Mugulu mu Ssingo,tebituukanye na mutindo gwa kuliisibwa bantu.

Kino kyatuddwa akulira ekitongole ky’eby’omutindo mu ggwanga ekya National Bereau of Standards Ben Manyindo bw’abadde akwasa abakungu b’akakiiko akaakwasibwa ogw’okulwanyisa embeera y’ekirwadde kino mu ggwanga Obukadde bwa ssente za kuno amakumi 20 obusondeddwa mu bakkozi b’ekitongole ekyo.Manyindo ategeezezza nti ku kkilo z’ebijanjaalo ezigobereza Obukadde Obuna ze baakeekebejja ebitundu 73% bye byokka ebituukanye n’omutindo ng’ate ez’obuwunga kkilo Obukadde omukaaga bwe baakeekebejja ebitundu 74% bwe bwokka obusaana okuliisibwa abantu.

Tumukunde asabye asibwe n’abasibe abalala

Munnamagye eyagannyuka Lt Gen Henry Tumukunde eyeevaamu ng’enkoko emira Ensanafu n’asonga ku ntebe ennene mu ggwanaga amale akwatibwe aggalirwe e Luzira alaze obwennyamivu ku ngeri gyakuumirwamu mu bwannamunigina mu Kawome gyali kyagambye nti kimumalirako ddala egya Nnakakaawa.Tumunde eyaggulwako ogw’okulya mu nsiiye olukwe n’okusangwa n’emmundu mu bumenyi bw’amateeka aleeteddwa ku lutimbe mu nkola empya eyagunjibwawo mu maaso g’omulamuzi wa kkooti ya City Hall Valeria Tuhimbise n’avumirira eky’okusibwa mu bwannamunigina gyoli ye musibe yekka ali e Luzira nti ate n’okummibwa olukusa olulaba abantube n’omusawowe kimumenya okukira eyeetisse Olubengo.

Mu birala byayogeddeko ebimunyiga Tumukunde agambye nti omuntu omulamu atakkirizibwa kukyusa ngoye ng’aleetebwa mu kkooti n’alabika nga bwazzenga alabika kikyamu nnyo era kirinnyirira eddembe erimuweebwa Ssemateeka.Omukulu ono alagiddwa addizibwe embuga nga 20th ppuliidawe n’aweebwa ga buwa addemu asabe olukusa olw’omuntuwe okweyimirirwa ensonga zitunulwemu nga 20th lwanaddizibwa.

Eyakulemberamu abeeyambulira CPS afiiride mu nju

Poliisi mu Kampala etandise okunonyereza ku nfa y’omu ku bakyala ababadde batanyigirwa mu Nnoga Alimadi Ann Barbara abadde omukwanaganya w’ekibiina kya Alliance For National Transformation asangiddwa afiiridde mu nnyumbaye e Kiwaatule.Ssekamwa wa poliisi mu Kampala n’emiriraano Patrick Onyango ategeezezza nti bategeezeddwa Wakibra Harry mu kiro ekikeesezza olwa leero ku ssaawa munaana ez’amattansejjere.

Ono ategeezezza nti baasindise basajja baabwe mu maka g’omuntu oyo balabe ekiyinza okubayamba mu kunonyereza okutandikiddewo ng’omulambogwe guleeteddwa mu ddwaliro ekkulu e Mulago.Ono agambye nti omulambo gw’omukyala oyo gusangiddwa gwevuunise n’amagulu agataliimu kwefunya kwonna era nga tewabadde kabonero konna kalaga nti waabaddewo ensiitaano mu nfaaye.Omukyala ono ajjukirwa bulungi bweyakulemberamu bakyala banne abataweneenera mu nsonga ne balumba ekitebe kya poliisi ekya CPS nga balese amabeere ebweru ku lw’okukwata kwa munnaabwe Ingrid Turinawe.

Abakulembeze banenyezeddwa olw’okusaasaana kwa COVID, WHO

Ekitongole ky’eby’obulamu eky’ensi yonna okwongera okusaasana kw’ekirwadde kya COVID 19 kikuneneyerezza bakulembeze b’amawanga ag’enjawulo abeefuula ba Nnampulirazzibi ku kuwabulwa abakugu mu by’obulamu kwebaafulumyanga entakera.Mu kiwandiiko kyafulumizza,akulira emirimu gy’ekikugu mu kitongole kino ekya WHO Dr Tedros Adhanom Ghebreyesus ategeezezza nti enkulungo y’ensi yonna okuba n’abaakakwatibwa abali mu Bukadde Obusatu obw’abantu kivudde ku butawuliriza magezi.

Ono waaviiriddeyo bwati kiddiridde okunenyezebwa okuzze kuwulirwa eri ekitongole kyakulira okuva mu mawanga okuli America ne Taiwan bwagambye nti nga bo aba WHO bawabula buwabuzi na kuwa magezi agava mu kunonyereza okukolebwa bannassaayansi abakugu so tebasobola kuwaliriza mawanga kusalawo ku kyegaagala kukola.

Ghebreyesus ategeezezza nti mu kiseera webaalangirira ekiseera eky’akazigizigi olw’ekirwadde kino nga 30th omwezi ogw’olubereberye abantu 83 bokka be baali baakakwatibwa ekirwadde kino wabweru w’eggwanga lya China wabula amawanga mangi tegaafaayo kuwuliriza ng’ate tegaalina balwadde kyokka wetwogerera omuwendo gwekubisizzaamu ebitagambika nga kati abantu Obukadde busatu n’emitwalo ena mu lukumi be bakakasiddwa okukwatibwa obulwadde buno.

Museveni ayogedde ku bafiira ebweru,baziikweyo

Bannayuganda ekirwadde kya COVID 19 bekinattiranga ebunaayira baakuziikwanga eyo awatali kubazza ku butaka.Mu kwogera kwa Kabwejungira Museveni akawungeezi akayise ategeezezza nti mpaawo bisigalira bya munnayuganda binakkirizibwanga kuddizibwa kuno ssinga kinaakakasibwanga ng’afudde bulwadde buno engeri obuwuka obukireeta gyebusigala nga bulamu okumala ekiseera ku mubiri gw’omuntu abeera afudde obulwadde obwo ssaako ennono zaffe wano ez’okwesembereza ennyo bannaffe ababa bavudde mu bulamu.Omukulu agambye nti na wano mu ggwanga ssinga kanaatandanga omuntu n’afa olw’obulwadde buno kyagambye nti asaba aleme kukiwulira, omulambo gunaazikwanga eyo awatali kugutambuza kwongera kusaasaana kwakyo.

Museveni asiimye ab’eby’obulamu abasawo n’ababeezi baabwe abakoze omulimu amakula mu kaweefube w’okujjanjaba abalwadde bano n’okusingira ddala abaasookerwako ng’ekirwadde kyakatuzinda era nga tewaali kweteekateeka kwonna wabula ne bakola kyebaasobola.Mu kwogera kuno okw’omulundi ogw’ekkumi n’esatu Kabwejungira asabye abavunanyizibwa ku by’emisaala obutalonzalonza bongeze bannassaayansi ensako n’emisaala olw’emirimu amtendo gye bakolera eggwanga n’awa eky’okulabirako ky’mbeera y’obulwadde buno obwatuzinda nti bakozenga butaweera buli kaddde okunonyereza.

Zo pikipiki n’obugaali Museveni alagidde zongerweko obudde zikomenga okutambula ku ssaawa kkumi n’emu ez’akawungeezi sso ssi munaana nga bweyali agambye mu kwogera okw’omulundi ogw’ekkumi n’ebiei.Omukulu ono ategeezezza nti okutangira abagoba ba pikipiki zino okutambula baakigendereramu kubaziyiza kutambula kiro ekyalyongedde emikisa gy’ekirwadde okusasaana.Bo abanaabeeranga mu mmotoka ezisaabaza eby’amaguzi nabo bakendeezeddwa okuva ku bantu abasatu nga bwekyali kyalangirirwa ne baddizibwa ku muntu omu era mu kaweefube y’omu.

Museveni yeeweredde okutandika okuyingizanga emmere okuva mu mawanga ag’ebunaayira ssinga kanaatanda abaguza Gov’t emmere omuli obuwunga n’ebijanjaalo okwongera okuduumuula emiwendo gyayo.Omukulu ategeezezza nti bannayuganda babadde batandikidde ddala okweyambisa omukisa gw’ekizibu ekyatuzinda nga balinnyisizza emiwendo gy’obuwunga n’ebijanjaalo beeyoolere omudidi mu kubiguza woofiisi ya Ssaabaminister kyavumiridde n’agamba nti ajja kuwalirizibwa okugigula ebunaayira waakiri ku ssente entono okusinga bannansi okunyaga eggwanga lyabwe obutereevu.

Luttamaguzi atabukidde abanene abakodo

Abanene mu Gavumenti eramula kuno basabiddwa obutalekera bannayuganda balala buvunanyizibwa bwa kudduukirira bantu bannaabwe mu kaweefube w’okubasondera eky’okulya mu kiseera kino wakati mu mbeera eriwo nga bwerabwa wabula nabo basitukiremu bakwateko mu nsawo.Bwayogeddeko naffe wano omubaka wa Nakaseke South Paulson Luttamaguzi agambye nti tebuba bwenkanya bannayuganda abatalina bwe bali kugabira ku bannaabwe ke balina ng’abakungu abanene mu Gavumenti abasuza obulindo n’obulindo bw’ensimbi basirise be cce bakola gwa kukwata bibaleeterwa balala nga gyoli tebalina kyebasobola kutoola.

Ono amenye abanene abawerako okutandikira waggulu ku Kabwejungira Museveni n’abamuddirira bonna baategeezezza nti tebannalabwako n’akatono nga batoola okuddiza ku bannayuganda wabula bakola gwa kwebaza baleese.

Ab’ensimbu zibakuba buteddiza olw’ebizibu

Bya Kizindo Lule

Bannakyewa abeekebakkeba eddimu ly’okubudaabuda bannayuganda abatawanyizibwa obulemu bw’Ensimbu aba Epilepsy Support Association of Uganda awamu n’okubamanyisa bwe basobola okubeezaawo obulamu bwabwe obulungi beeraliikiridde olw’okweyongera kw’ebigwo by’ensimbu mu bantu baabwe.

Akulira bannakyewa bano omukyala Sarah Nekesa bwetwogeddeko naye enkya ya leero ategeezezza nti embeera eri mu ggwanga ey’okweraliikirira wakati mu butamanya kiki kiyinza kuddirira ssaako abantu kyenkana bonna okusiiba awaka nga n’eky’okulya oluusi tebalina abantu baabwe bangi ensimbu zeeyongedde okubakuba engeri gyebuli bulwadde bwa bwongo.Nekesa era agambye embeera y’ebigwo eno eriwo esajjuddwa n’obukalubo obuliwo okutuuka mu malwaliro gyebaalifunye obujjanjabi.