POLIISI EKKIRIZZA OKUKWATA ABABAKA MU ARUA

Poliisi mu Arua ekakasizza okukwatibwa kw’ababaka abawerako ku luuyi oluwabula Gavumenti mu lukiiko lw’eggwanga olukulu embeera bweyayonoonese akawungeezi akayise Kabwejungira Museveni bweyagwisanyizza obwenyi n’abali ku luuyi olwo abawagira Kassiano Wadri azze ku bwannamunigina ku bubaka bwa Munisipaali eyo.

Aduumira poliisi mu ttundutundu eryo Jonathan Musinguzi ategeezezza nti weewaawo Wadri be baamukutte n’ababaka baatannayasanguza mannya wabula Bobi Wine tebamulina.Byo eby’okwerinda eruuyi eyo bikyayongerwamu ebirungo olw’akalulu akasuubirwa olunaku lw’enkya okuba aka kanaayokya ani.

POLIISI EZZE E KAYUNGA OKUZIIKULA EBISIGALIRA MU SSABO

Eby’okwerinda bya manyinnyo ku kyalo Kisoga ekisangibwa mu district ye Kayunga  nga poliisi eyongera okusima n’okuziikula emirambo gy’abantu abagambibwa okuziikwa abavubuka abeeyita abasawo ab’ekinnansi.Omu ku batuuze ku kyalo ekiriraanye kino Kabuuka James atubuulidde.

Ono atuteezezza nti abasinga ku bantu abeekuluumuludde ne beeyiwa wano baliko abantu baabwe abaababulako ng’obolyawo babasuubira okuba nga be bamu ku baaziikibwawo.Ono agamba nti balindirira kalakita ggunduuza etandike ogwayo.

POLIISI EBULONZE N’ABATUUZE

Wabaddewo vvaawompitewo,enkalu okukalambira,okweyambisa omukka ogubalagala n’okusasira amasasi mu bbanga Poliisi ye Ssanga mu Wakiso bwebadde egezaako okutangira obumenyi bw’amateeka abatuuze bwebatanudde okukoona n’okwonoona ebintu bya Hussein Katamba agambibwa okukuba Ssekyanzi omugoba wa Boda boda ennyondo ku mutwe n’ekigendererwa ekimutta n’okugimubbako.

Agatusakira mu kitundu kino Ssebuliba Ezra atutegeezezza nti Katamba oluvannyuma lw’okumanya nti gweyakubye akatayimbwa teyafudde n’agenda mu dwaliro ly’amagye e Bombo amuwe obutwa afe eby’embi n’akwatirwayo,wetwogerera ng’abasibe abatemu ababiri bali ku poliisi e Kasangati nga n’olutalo lw’okutaasa ebyabwe poliisi lugiremeredde nebabiteekera omuliro.

POLIISI EYODDE ABABADDE BABBA MU KAMPALA

Poliisi eriko abatamanyangamba amakumi 50 ababadde bagufudde omugano okusuza bannakampala ku tebuukye beeyodde mu kikwekweto ekituumiddwa Gumisha Usalama Kampala n’emiriraano.

Aduumira poliisi mu Kampala n’emiriraano Frank Mwesigwa ategeezeza nti baliko n’ebizibiti ebiwerako omuli emmundu ya Basitoola,amasasi,obwambe,amajambiya n’emmotoka.

Mwesigwa agamba nti balina n’abantu 15 ababaddenga bagenda basuula ebibaluuwa ebyewerera okutta abantu be bakutte.

Kivvuunuddwa Charles Kizindo

POLIISI EYATUDDE, BANNABYABUFUZI BATABUDDE EDDEMBE

Ssaabaduumizi wa poliisi ya kuno Gen Kale Kayihura ategeezezza nti bakizudde nga waliwo bannabyabufuzi abali emabega w’ettemu n’okuteeka bannayuganda ku bunkenke ebigenda mu maaso mu ggwanga.

Ono asinzidde ku poliisi e Katwe bwabadde ayogera ku butebenkevu mu ggwanga obuli yegeyege.Kayihura agamba nti kyaliba ng’ekiruubirirwa ky’abannabyabufuzi bano kwekyaya bannayuganda ng’aliko n’abateeberezebwa okuba emabega w’enteekateeka zino amakumi 20 b’asimbye mu maaso ga bannamawulire.

Kivvuunuddwa Charles Kizindo

POLIISI EBALUNZE OMUKKA OGUBALAGALA KU MMERE

Poliisi erunze omukka ogubalagala mu bataka e Katakwi ababadde bakungaanye okwefunira ak’okuzza eri omumwa bannakibiina kya FDC ke babadde babatwalidde.

Bannakibiina kino nga bakulembeddwamu Ret Col Dr Kiiza Besigye babadde batwalidde abataka bano emmere oluvannyuma lw’okulaajanira abagirakisa babajune ku njala ebakalangidde emyezi egiweze.

Bano bategeezeddwa nti obuyambi obw’engeri eno buteekeddwa kutuusibwa Gov’t eri abataka nga bayita mu ministry y’ebibamba ebigwabitalaze.

Photo Credit: Amnesty International

POLIISI ERABUDDE KU BATUJJU N’ABABBI MU NNAKU ENKULU

Poliisi esabye bannayuganda okukolaganira awamu nayo mu kaweefube gweriko ow’okubakuuma obulungi n’ebyabwe mu kiseera kino eky’ennaku enkulu kyetwolekedde.

Ssekamwa wa poliisi mu ggwanga Andrew Felix Kaweesi ategeezezza nti emitendera eginaayitwamu okukuba ebiriroliro essaawa yonna gyakufulumizibwa era n’asaba bannannyini bifo byonna ebisanyukirwamu obuteerabira nti mu biseera by’amasanyu n’abatujju mwebaagalira okulumiza eggwanga.

Kaweesi asabye abasuubuzi baleme kutambulanga na butitimbe bwansimbi.Ono y’omu akakasizza nti emirimu mu bitundu bye Kasese kati gitambula kinnawadda oluvannyuma lw’okulinnya kunfeete abakuumi b’Omusinga b’agambye nti baali baagala kwefuula Mawale nga zino ensozi z’omu Bulemeezi nti ate abaakwatibwa 137 omu kubo yafiiridde mu ddwaliro wabula banne enkuyege bezikyakubira enduulu 136 baakusimbwa mu mbuga z’amateeka bavunaanwe.

Kivvuunuddwa Charles Kizindo

 

OMUKOZI WA POLIISI EYABBA PIKIPIKI YAAYO MUKWATE

Poliisi mu district ye Buyikwe eriko omusajja abadde akola ogw’okutangira obumenyi bw’amateeka ategeerekesenga Bbayo Abbey gwekutte n’eteeka emabega w’emitayimbwa lwabigambibwa nti yabba pikipiki ya poliisi eyali emuweereddwa okukolerako emirimugye.

Ssekamwa wa poliisi mu ttundutundu lya Ssezzibwa Lamek Kigozi ategeezezza nti omukwate bazze bamuwoona okuva lweyakwasibwa pikipiki eno ng’olwagikwasibwa ebyayi n’abinnyika munsuwa nagenda mu bukiikakkono bw’eggwanga neyeekisa.

Pikipiki gyeyabba eri Number UEK 510D ng’essaawa eno akuumirwa ku kitebe kya poliisi e Lugazi.

Kivvuunuddwa Charles Kizindo

Photo: ChimpReports

BASATU BAKWATIDDWA KU KUTTIBWA KW’ABAPOLIISI

Poliisi e Kasese eriko abantu basatu beetaddeko obunnyogoga lwabigambibwa nti bandiba nga babadde n’akakwate ku ttemu erikoleddwa ku basajja baayo ababiri abattiddwa enkya ya leero.

Ababiri bano okuli Danson Tweheyo ne munne Ronald Kalemeera ababadde bakolera mu poliisi ekwasaganya egy’eby’obulambuzi battiddwa abantu abatannategeerekeka.

Aduumira poliisi mu ttundutundu lya Rwenzori Samuel Odong ategeezezza nti abasatu bano ababadde abakozi mu wooteeri emanyiddwanga Simba Safari Camp baakubayambannyo mu kunonyereza kwebatandise enkya ya leero.

Ssekamwa wa poliisi mu ggwanga Andrew Felix Kaweesi ategeezezza nti bayungudde basajja baabwe okunonyereza ku ttemu lino.

Photo: ChimpReports

POLIISI ETADDEWO ENNYONYI ENAATAMBUZA EBIGEZO

Ekitongole kya poliisi kiteereddewo kinnaakyo eky’ebigezo mu ggwanga ennyonyi ey’ekika kya Namunkanga n’emmotoka ennawunyi n’ekigendererwa ekiraba nti ebigezo bino bitambuzibwa bulungi okutuusa nga biwedde.

Kitegeezeddwa nti poliisi yaakuyamba mu kutambuza ebigezo bino okubituusa gyebinaggyibwanga nga bikolebwa n’okusingira ddala mu bitundu eby’amasosso g’ebyalo n’enguudo gyezinaasereranga olwo Nnamunkanga ebituuseeyongayo.

Ssekamwa wa poliisi Endrew Felix Kaweesi ategeezezza nti entandikwa tebadde nabuzibu bwonna era n’alabula abasomesa bonna abaneenyigira mu kibbabigezo.

Bo abayizi abaatwala essomo ly’okukuba n’okusiiga ebifaananyi bamalirizza ekigezo kyabwe okwo gattako ab’essomo lya Short Hand abaafulumye edda engeri kino gyekikolerwa eddakiika amakumi ana gokka lwo olunaku olw’enkya baakukeerera mu ssomo lyakutabula ddagala erimanyiddwanga Chemistry olupapula olw’okusatu.

Ono era akakasizza nti bakyagendera ddala mu maaso n’okutangira Ret Col Dr Kiiza Besigye munna FDC eyayaayaanira ku ntebe y’obukulembeze bw’eggwanga lino ssinga bakizuula ng’agenda kutataaganya bannansi.

Kaweesi ategeezeza nti mwami Besigye tebannamusibira mu makaage yeetaaya nga bwayagala weewaawo ng’ateekerwawo obukwakkulizo.