GAVUMENTI YEESAMBYE EBY’OKUSASULIRA OBUJJANJABI BWA BOBI WINE NE ZAAKE

Ministry y’eby’obulamu esambazze ebibadde bigambibwa nti akakiiko k’eby’obulamu ke kaalwisa okutwalibwa kw’ababaka ababiri Robert Kyagulanyi ne munne Francis Zaake okujjanjabwa.Bwayogeddeko ne bannamawulire ku Ssengejjero lyago Minister w’eby’obulamu Dr Jane Ruth Aceng ategeezezza nti oluvannyuma lw’okwanguya kw’omubaka Kyagulanyi n’abantube okukkiriza okukeberebwa abasawo ba Gavumentit yayanguyirwa okutwalibwa ebunaayira okujjanjabwa wabula munne Zaake n’abantube baalwawo okusalawo okumukkiriza okukwatibwako abasawo ba Gov’t.

Aceng ategeezezza nti Omubaka Zaake yagenda okukkiriza okukeberebwa lwali lwa Mukaaga atenga abasawo baali bayingidde ggandaalo nga y’ensonga lwaki baamukeereddeko lwa Bbalaza n’akeberebwa era n’akwasibwa ab’eby’okwerinda nabo bamute agende nga bwegwabadde.

Minister Aceng wabula akakasizza nti Gavumenti tegenda kusasulira bujjanjabi bwa babaka bano olw’ensonga nti embeera mwebaali yali teyeetaaga kutwalibwa bunaayira wabula bo bennyini baayagala baweerezebweyo ob’olyawo bafune obujjanjabi bwe baayagadde sso ssi bwebaalibadde beetaaga okusobola okutereera obulungi.

 

 

BOBI WINE NE BANNE BATEEREDDWA,KIRI BULALA E GULU

Essanyu likize okuttira abawagizi b’omubaka Robert Kyagulanyi Ssentamu ne Kassiano wadri wabweru wa kkooti enkulu e Gulu oluvannyuma lw’okufuna amawulire g’okuteebwa kwabwe.

Babaka bannaabwe abalala okuli Paul Mwiru n’abalala bonna bakkiriziddwa okweyimirirwa omulamuzi wa kkooti enkulu e Gulu. Bannamateeka baabwe nga bakulembeddwamu Abdul Katuntu basinze nnyo kwesigamya kusaba kwabwe ku mbeera y’obulamu bw’abasibe,abamu kubo abakulu mu myaka ssaako ebbeetu eribaweebwa Ssemateeka.

Bwebabadde bakkirizibwa okweyimirirwa omulamuzi akakasizza nti kituufu abantu be baleese okubeeyimirira bannayuganda abamanyiddwa obulungi era abasuubirwa obutalemererwa kubazza mbuga ssinga baba beetaagibwa.Oluuyi oluwaabi lusoose kusaba mulamuzi bannabyabufuzi bano abagaane okuddamu okwenyigira mu kutambula okulaga obutali bumativu bwabwe n’ebirala byonna ebiyinza okuyitwamu okukuma omuliro mu bantu.

Mu bateereeddwa Kassiano Wadri engeri gyali mubaka wa Arua abadde asuuliddwa emisanvu obutadda mu kitundu ky’akiikirira olw’okwewala okwongera okuseesa mu butabanguko wabula Omulamuzi wa kkooti eyo amulagidde buli lwanaabanga ayagala okutuukako mu balonzibe asookenga kufuna lukusa kuva mbuga okumala ebbanga lya myezi esatu.Bano balagiddwa basse emikono ku bukalu bwa Bukadde Butaano Butaano obutali bwa buliwo n’ababeeyimiridde Obukadde kkumi kkumi era obutabadde bwa buliwo.

Ye eyaliko omuduumizi w’eggye ly’eggwanga erya UPDF Gen Mugisha Muntu y’omu ku baggyeeyo obwenyi okweyimirira Omubaka wa Kyaddondo East mu lukiiko lw’eggwanga olukulu Robert Kyagulanyi abadde amaze akaseera mu mikono gy’ab’eby’okwerinda ne mu kkomera.

AMAGYE GEJJEEREZZA BOBI WINE,POLIISI EMUKUTTE

Omubaka Robert Kyagulanyi Ssentamu Bobi Wine aggyiddwako emisango gyonna gyabadde avunaanibwa mu kkooti y’amagye ebadde ekulembeddwamu Ssentebe waayo Gen Andrew Gutti.Ono ng’akiikirirwa bannamateekaabe abakulembeddwamu Omubaka Medard Lubega Sseggona baasbye kkooti eno emuggyeko emisango gino engeri gyewatabadde bukakafu bumala ng’ate ssi muserikale nga kale okumusimba mu maaso ga kkooti y’amagye kibadde kirinnyirira ddemberye.

Kyagulanyi bw’abadde tannaddamu kukwatibwa tutegeezeddwa nti bannaKampala n’okusingira ddala ewa Kisekka bajaganyizza byansusso oluvannyuma lw’amawulire ga mukwano gwabwe okuggyibwako emisango mu kkooti y’amagye okuwulirwa.Byo eby’okwerinda mu Gulu n’emiriraano biri ggulugulu nga poliisi n’amagye byatazaamye enguudo ezisinga mu kaweefube eyagendereddwamu okutebenkeza eddembe ssinga wabaddewo akagagambulabbwa konna akabalukawo.

BOBI WINE NE BANNE BATANDISE OKUBBINKANIRA AKALULU

Kakuyege w’abeegwanyiza ekifo ky’obubaka bwa Kyaddondo East mu lukiiko lw’eggwanga olukulu mu butongole atandika leero.Abantu musanvu be baggyayo obwenyi ne bayaayaanira ekifo kino ng’ebibiina biri bibiri byokka ebirina ababikwatidde bendera mu butongole okuli NRM eyaleese Sitenda Ssebalalu ne FDC n’ereeta Apollo Kantinti okwo ne kwegatta omuyimbi ow’erinnya Robert Kyagulanyi amanyiddwanga Bobi Wine eyazze ku bwannamunigina ne bannaabwe abalala bana era abazze nga tewali kibiina kibafuzzeeko ddusu.

BOBI WINE AMALIRIDDE,AYINGIDDE EBY’OBUFUZI

Omuyimbi ow’erinnya Robert Kyagulanyi Sentamu amanyiddwa nga Bobie Wine alaze obumalirivu mu kuvuganya ku kifo ky’omubaka wa Kyaddondo East era ng’asuubirwa okusunsulwa essaawa yonna ng’enteekateeka z’akakiiko k’eby’okulonda bwezinaaba.

Kyagulanyi ategeezezza nti kino kye kiseera kyennyini kyateekeddwa okuviirayo abantube aba Kyaddondo East era ng’asuubira waakuyingira etteeserezo ly’eggwanga.

Kivvuunuddwa Charles Kizindo

 

BUGANDA EYANUKUDDE KU KYA BOBI WINE

Obwakabaka bwa Buganda buvuddeyo ku nsonga y’ettaka erisangibwa e Busaala okuliraana n’ekifo ky’abadigize ekya One Love Beach ey’omubanda wa Kabaka Robert Kyagulanyi amanyiddwanga Bobi Wine.

Kitegeezeddwa nti Bobie Wine ekifo kino ekiwerako yiika ennamba n’ekitundu yali takifuniranga liizi era nga kibadde kikyali kyereere y’ensonga lwaki abadigize babaddenga bakisimbamu mmotoka zaabwe.

BOBI WINE EBBANJA LINAATERA OKUMUSIIWUULA

Nga bwebaalugera nti lwakwaka nga misana kaakiro tabulamu,n’eby’omuyimbi Robert Kyagulanyi amanyiddwa nga Bobie Wine ssi birungi ebiro bino olw’amabanja agaagala okumutuuka mu bulago era agatakyamuganya na kwebaka ng’ow’olugambo lwaffe atutegeezezza nti asula akulungutana ssinakindi okunaaba enfunda eziwera mu kiro olw’olubuguumirize olwamuzinda oluva mu kweraliikirira.Tutegeezeddwa nti ekitongole ekiwoozi ky’emisolo kiwandiikidde muzzukulu wa Kayiira ono enfunda eziwera ng’abanjibwa ensimbi eziri eyo mu Bukadde bwa ssente za wano amakumi 54 okuli emisolo egiwoozebwa ku nnyingiza y’omuntu (Income tax) okuva mu mwaka gwa 2008 okutuusa leero ne kantanyi w’engassi olw’okulwawo okusasula.

Amalala agatusomoleddwayo galaze nti mwanamulenzi Bobie Wine yeefuulidde ddala nnampulirazzibi eri amabaluuwa agazze gamuweerezebwa nti ate bwanaagenda mu maaso n’okwesuulirayo ogwa nnaggamba ensimbi zino zandibalirwamu n’amagoba.Kimanyiddwa bulungi nti Omubanda wa Kabaka ono y’omu ku bayimbi ba wano ensimbi beziyitaba obuyitabi ng’alina n’amaka agatemya ng’omuntu g’tasobola kuwa muvubuka wa myakagye agasangibwa ku kyalo Magere ku ludda e Gayaza,ekizimbe kya Ssemaduuka,ekifo omukyakalirwa wano e Busaabala ku nnyanja Nnalubaale,amaato agakyakalirwamu mu kifo kino n’emmotoka ezaakazibwako ensajja.Gonna getunaagenda tukunojjolera okuva ew’omugagga kati atandise okutunula ebiriroliro tuli ba kugakutuusaako ng’ow’olugambo lwaffe bwanaagenda agawuliriza.