EYAKIIKAKO MU PAALAMENTI ALEMESEZZA OKUMALIRIZA ESSUNDIRO LYA ISIMBA

Eyaliko omubaka we Ntenjeru South Tom Kazibwe y’omu ku bannayuganda enkumu abaliko obutitimbe bw’ensimbi bwe babanja ku njazi ezeeyambisibwa ku ttaka lyabwe.

Ng’akakiiko k’eby’ettaka akakulirwa Omulamuzi Catherine Bamugemereire kakyagenda mu maaso n’okutaganjula ensonga ezaaviiriddeko okwesiba kw’emirimu gy’okumaliriza ebbibiro ly’amasannyalaze erya Isimba Hydro power dam nga bayita mu kubanja ensimbi ezisukkiridde obungi,KKazibwe ategeezezza nti yasasulwako Obukadde 750 ku bwakkanyizibwako Obuwumbi 88.

Ono abanja za mayinja,omusenyu n’ekitundu ku ttakalye eriweza yiika 60 erisangibwa e Nakatooke mu Kayunga.

 

BANNAMITYANA BAWAKANYIZZA EMISOLO KU MAYUMBA

Bannayuganda abawangaalira mu Mityana beeweredde okuggalawo amayumba gaabwe olw’emisolo egitandise okubagerekerwa ku mayumba gaabwe ge bagamba nti agasinga basulamu masule newankubadde gaazimbibwa mu ngeri y’amakozi ga nsimbi.

Twogeddeko n’abatuuze mu ggombolola ye Manyi abasing gyebaamalirizza okugerekerwa emisolo gy’amayumba nga bagamba nti kyamazima ddala abakungu ba district yaabwe baagala kubagoba mu ggwanga lyabwe ssinakindi kubabulizaako ddala webaggya kyakulya.

EYADDUKA MU KKOOTI AKWATIDDWA MU BUBBI

Ow’ebijambiya eyadduka ku baserikale e Kalungu ssabbiiti ewedde eyatoloka mu kkooti e Masaka akubiddwa ebyasi ebimulumizza n’aweebwa ekitanda mu ddwaliro e Mbarara.

Ssekamwa wa poliisi Emilian Kayima agamba nti ono ye Musa Galiwango abaali balumbye omusawo e Mukoko mu Kalungu poliisi emale ebawoone munne Mohammad Kiddawalime amale attibwe abatuuze bwebaamusanga ng’agezaako okutuga OC eyali amukutte Galiwango weyaddukira.

Ono kigambibwa nti abadde mubbi eyeeyambisa ebijambiya n’emmundu nga kwebagasse n’okukwatanga abakazi be basanga gyebanyaga.

AB’EBY’OBULAMU BAAKUGEMA CHORELA

Ministry y’eby’obulamu emalirizza enteekateeka z’okugema bannayuganda ekirwadde kya Chorela ekiva ku bujama n’obuligo esuubirwa okuggyibwako akawuuwo mu mwezi ogujja ogwa Muzigo.

Ssekamwa wa ministry eno Vivian Nakaliika ategeezezza nti enteekateeka eno egendereddwamu kwongerera ddala kukendeeza mikisa gya kulumbwa kirwadde kino nga baakutandikira mu district gyekibadde kikyasinze okwegirisiriza.Eddagala lino okwawukanako ku ddala lyonna erigema lyakuweebwanga abantu abawezezza omwaka ogumu mu kamwa emirundi egy’enjawulo.

Ekirwadde kino kizze kiyimbya abataka be Hoima endubaale okuviira ddala mu mwezi ogw’okubiri weewaawonga kigenze kigemebwa amampaati naye ng’omuntu omu akyali ku kitanda.

 

 

JIMMY LWAMAFA NE BANNE BASABA KWEYIMIRIRWA

Abakungu abasatu abaakoleranga mu ministry y’abakozi ba Gov’t okuli eyaliko Omuwandiisi ow’enkalakkalira Jimmy Lwamafa,eyakuliranga ababalirizi b’ebitabo Christopher Obey ne Kaminsona eyavunanyizibwanga ku nsonga z’obusiimo Steven Kiwanuka Kkunsa leero basuubirwa okulabikako mu maaso g’omulamuzi wa kkooti ewozesa abalyake n’abakenuzi basabe okuddamu okweyimirirwa.

Bano essabbiiti ewedde baali baleeteddwa embuga wabula Amyuka omuyingiza w’emisango e mbuga Suzan Kanyange omusango n’agwongezaayo engeri abawaabi ba Gov’t gyebali mu kwekalakaasa.Bano bawererennemba na gwakwezibika Obuwumbi 15 obwali obw’akasiimo k’abaaliko abakozi bwebeekobaana ne Bob Kasango.

KABAFUNZAKI NE BASAJJABE BALI MU KKOOTI LEERO

Omulamuzi Margaret Tibulya owa Kkooti enkulu leero lwatandika mu butongole okuwuliriza omusango gwa minister w’ensonga z’abakozi Herbert Kabafunzaki ne banne okuli Bruce Lubowa ne Mugabo Brian.Omulamuzi Agnes Alum owa kkooti ewozesa abalyake n’abakenuzi ye yasindika Minister Kabafunzaki mu kkooti eno omwezi oguwedde.

Ono ne banne bawerennemba na gwakwekobaana mu kuggya kyojamumiro eky’Obukadde 15 ku nnannyini Kampuni ya Aya Mohammad Hamid.

OMUMULI GW’EBY’ENNONO-KIBUUKA

Bya Kizindo Lule

Olwa leero lwa Kazooba olwa Bbalaza,ennaku z’omwezi ziri 17th omwezi guno ogwa Kasambula Ogw’omusanvu.

Leero njagadde twogere ku nnono z’erinnya Kibuuka.

Erinnya lino lyatandikira ku Musajja Kyobe mutabani wa Wannema abaabeeranga e Ssese mu Bizinga.

Erinnya Kibuuka,Kyobe yaliggya ku ngeri gyeyajjamu ku lukalu ng’ava e Ssese,banne bwebaali baamusaba asaabale nabo mu lyato n’agaana era n’abasaba basaabale bagende.

Kalyesubula ne banne bagenda okugoba ku lukalu nga Kyobe mutaka wajjo nebeebuuza nti’’ Ono abuuse bubuusi?’’ weyaggya erinnya Kibuuka.

Kibuuka yasimba ekitooke nga y’akagoba ku lukalu e Nsamu ku mwalo Mulindi.

Kino olwassa abanyolo nebagenda bayunjeeko ettooke,Kibuuka olwabalaba n’atanula okulwana nabo okutuusa lwebaamutta.

Ku kitooke kino Abaganda baggyako olugero nti ‘’ Oli kalunsambulira nga Kitooke kya Kibuuka’’.

Kibuuka ono era y’amanyiddwanga Kibuuka Omumbaale eyalwanirako Nakibinge Omulwanyammuli mu lutalo n’Abanyolo.

KKANISA E LUWEERO ETUUZIZZA TTABAMASOMERO

Abasomesa mu masomero g’ekkanisa ya Uganda abakakkalabiza mu masomero agali wansi w’obulabirizi bwe Luweero obutwala district essatu okuli Nakaseke,Nakasongola ne Luweero olwa leero beevumbye akafubo n’Omulabirizi abatwala ow’Obulabirizi buno Kitaffe mu Katonda Eridaadi Nsubuga bamuumuunyemuumunye mu bizibu byebasanga mu mulimu guno awamu n’okwejjukanya gyebayise ebbanga ery’omwaka omulamba lyebamaze bukyanga baawukana.

Ssentebe w’abasomesa abakakkalabiza mu masomero gano Omulangira Jemba Kalema Enock ategeezezza nti basaanidde okusisinkanaga mukama waabwe Omusumba abasuma bonna olwo nabo basobole okubangulanga emiti emito n’emikisa awamu n’obuyinza bweyabakwasa.

AB’ENJU YA SSEBAANA BASIIMYE KCCA OLW’OKUSIIMA EMIRIMUGYE

Omulabirizi w’Obulabirizi bwa West Buganda Kitaffe mu katonda The Right Rev Henry Katumba Tamale asinzidde mu lutikko Namirembe mu kusabira omwoyo gw’omugenzi eyaliko Ssenkaggale wa DP John Ssebaana Kizito n’akubiriza abantu okujjukiranga okukolerera eggulu n’okumanya nti enkomerero ya byonna omuntu waakusisnkana Katondawe.

Bo bannabyabufuzi ba wano ab’amannya bangi nga bakulembeddwamu Ssenkaggale wa DP Norbert Mao beetabye mu kusabira omwoyo gw’omugenzi nga Kkanisa ekubyeko n’ebooga ng’oluuyi lw’Obwakabaka bwa Buganda lukulembeddwamu Kamalabyonna Oweekitiibwa Charles Peter Mayiga ng’olwa Gov’t lukulembeddwamu Nnampala wa Gov’t Ruth Nankabirwa.

OMUMULI GW’EBY’ENNONO- KASAMBULA OGW’OMUSANVU

Olwa leero lwa Kazooba,Bbalaza ennaku z’omwezi ziri 3rd omwezi guno ogwa Kasambula Ogw’omusanvu gwetwakatandika.

Ng’ennono z’akawaayiro kaffe kano ak’amakulu n’ennono y’erinnyalyo bweziri,buli ntandikwa ya mwezi twogera ku nnono y’erinnya ly’omwezi ogwo.

Omwezi guno gumanyiddwa nga Kasambula engeri okuva edda gyegwayakangamu omusana era Abaganda mwebaasambuliranga oba mwebaategekeranga aw’omusimba mu masimba agaddiriranga mu mwezi gw’omunaana.

Olw’omulimu guno ogwakolerwanga mu mwezi guno ogw’okusambula Omuganda yasalawo gutuumwe Kasambula.

Omusomi waffe jjukira nti Omuganda yatuumanga amannya okusinziira ku mirimu gyeyakolanga n’ekiseera mweyagikoleranga.