ABABAKA BAGOBEDDE DDALA WANO OBUGWENYUFU

Ababaka mu lukiiko lw’eggwanga wano abali mu Ttabamawanga eyatudde mu kibuga Geneva ekya Switzerland bazzeemu nebasimbira ekkuuli ekiteeso ky’okukubaganya ebirowoozo ku bbago ly’eby’okwegadanga okutali kwa butonde nga bakulembeddwamu omukubiriza waabwe Rebecca Alitwala Kadaga.

Bano bagamba nti enteekateeka eno ewomeddwamu omutwe ababaka ba Canada ne Belgium abaabadde bagenda bamatiza ababaka abalala okuva mu mawanga ag’enjawulo okukiwagira wabula abaffe ne bagaana nga bagamba nti buno bugwenyufu bwennyini obutakkiriganyizika nabwo mu mawanga ga Ssemazinga ono.

Ekiteeso kye baasimbidde ekkuuli kitunuulidde abasajja n’abakazi okwesanyusanga mu nsonga z’omukwano mu bwannamunigina,abasajja n’abakazi okwagalana n’abantu ab’ekikula ekimu mu butonde,n’abavubuka abawakanya obutonde bwabwe aba Transgender.

BETTY KAMYA ALABUDDE LUKWAGO KU SSANYU LY’OKUGENDA KWA MUSISI

Minister wa Kampala Betty Olive Namisango Kamya atenderezza Nnampala w’ekibuga Kampala eyasabye okulekulira Jennifer Musisi Ssemakula bwategeezezza nti yakola kinene nnyo okuzza engulu ekitongole kya KCC ekyali kyafuuka Kiguumaaza ng’Ekibugo ekikuuma Empindi.

Betty Kamya agamba nti okufuula ekitongole kino KCCA kyazzaamu nnyo amanyi bannaKampala essuubi n’ekibuga nekidda buggya.

Bwayogedde ku mukyala ono,Betty Kamya agambye nti abamuvumiridde ku byakoze mu Kampala nga Loodi Mayor n’agamba nti balindirira kiva eri kamulonda yennyini M7.

ASIBIDDWA LWA KUYAMBA BAYIZI KUZIKIRIZA MULIRO

Omuntu omu atemeza mabega wa mitayimbwa ku bigambibwa nti yaaliba yabadde mabega wa kyokerezi ekyakoleddwa ku kisulo ky’abaana ab’obulenzi mu ssomero lya Naalya Sec Sch Namugongo.

Akulira essomero lino Angella Kasobya agamba nti omusajja ono atannategeerwa nnyo bimukwatako yasangiddwa mu ngeri etaategereekese ng’ayambako abayizi okuzikiza omuliro guno ogwakutte ekisulo kino akawungeezi akayise.

ENSIMBI EZITAMBUZA EMIRIMU GY’EBIBUGA TEWALI

Gavumenti terina nsimbi kusobola kutambuza bulungi ggombolola zaayo empya,Town Concil ne Munisipaali ezaalambwa gyebuvuddeko.

Kino kikakasiddwa minister omubeezi owa Gov’t ez’ebitundu Jenniffer Namuyangu bwategeezezza ababaka mu lukiiko lw’eggwanga nti beetaaga Obuwumbi 160 okugabira abakozi muzo emirimu n’okusimbula emirimu gyazo.Eggombolola ezoogerwako ziwerera ddala 98,ebibuga ebiri ku mutendera gwa Munisipaali 9 ne Town Council 203.

ABAKULU B’AMASOMERO BENNYAMIDDE,ABAANA TEBATANDISE

Ng’amasomero gagguddewo olusoma olw’okusatu olwa leero mu butongole,abazadde mu district z’amasosso g’eggwanga batono abasobodde okuzza abaana baabwe ku masomero ng’okuvaako mu district ye Luweero agatusakirayo Ssemwanga Lutaaya atalaaze amasomero agasinga ng’agalimu abaana abasoba mu lusanvu kusomyeko nga kikumi kyokka ng’ag’abaana abali wansi w’ebisatu abaana abatawera makumi ataano be bokka abasomye.

Okuvaako mu district ye Mpigi agatusakirayo John Bemba naye atutegeezezza nti kyamazima abaana tebalabise ng’abazadde beekwasizza bbeeyi ya kasooli kuba wansi ate nga kye kirime kyebasuubiramu ebisale by’abaana.Eno amasomero ga Gavumenti agasinga tegawezezza baana makumi ataano ataano abasomye newankubadde nga bo abasomesa babaddeyo.

POLIISI ERABUDDE ABAANA N’ABAZADDE KU BAFERE

Poliisi mu Kampala n’emiriraano erabudde abazadde n’abayizi okubeera abeegendereza ennyo mu kuzza abaana ku masomero olw’abakuluppya abangi ennyo ababateegedde mu kibuga Kampala n’okusingira ddala mu ppaaka za takisi,mu butale egulwa ebikozesebwa ku masomero ssaako mu Bbanka gyebasasulira ebisale.

Ssekamwa wa poliisi mu ttundutundu lino Luke Owoyesigire ategeezezza nti abakuluppya bano beeyambisa nnyo ebiseera nga bino nebatanula okunyaga abazadde n’okubuzaabuza abayizi.Ono ategeezezza nti poliisi esindise basajja baayo mu bitundu ebirimu ebisulo by’abayise n’abadigize okutangira abaana ab’obuwala ab’obuwala obulenzilenzi okubabuzaabuza ne bubibatwalamu.

OMUKWANO MU NKUZA Y’ABAANA KIKULU NNYO

Mu mawulire g’ensonga z’abaana n’ekitongole kya UNICEF,abazadde bakubiriziddwa okukulembezangamu omukwano mu kukuza n’okugunjula abaana baabwe n’ababeera mu mikono gyabwe ku lw’obulungi bw’obulamu bwabwe obw’omu maaso n’eggwanga lyabwe.Omusasi waffe asisinkanye omukwanaganya w’emirimu gy’okuyigiriza abaana abato eddiini (Sunday School) mu Kanisa ya St James Nakirama Church of Uganda eri wansi w’obusumba bwe Mugongo mu Busaabadinkoni bwe Nateete Antie Elizabeth n’amutegeeza nti Ekyasa ky’okukambuwalira abaana ekiyitiridde kyaggwako abaana ssi bisolo nti balundwa na miggo wabula okubuulirirwa n’okulaga eby’omu maaso awatali kubakubira bitaliimu. Ono asabye abazadde okukuliza abaana mu ddiini ku lw’ensi etalibaamu ntalo na kunenengana ate babayigirize enkwata y’ebintu ey’emirembe.

 

MATEMBE ATABUKIDDE AB’EBY’EMISOLO

Eyaliko minister w’eby’empisa n’obuntubulamu Miria Koburunga Matembe ayambalidde abakungu ba ministry y’eby’ensimbi n’okuteekerateekera eggwanga ssaako ab’ekitongole ky’eby’emisolo olw’okusoloozanga bannayuganda obulindo n’obulindo bw’ensimbi nga bayita mu misolo wabula nebatabaako kyebabakolera.Ono asinzidde mu lukungaana olw’okukubaganyirizaamu ebirowoozo olutuuziddwa wano mu Kampala n’agamba nti bannayuganda tebaalikaluubiriziddwa kuweesebwanga misolo gyebataganyulwamu.Matembe agamba nti bo ng’abaalaba ku Gov’t ezaayita balaba ebituli bingi mu buweereza obuliwo ebiro bino.

Ku nsonga z’ababaka ababiri abaatwalibwa ebweru okujjanjabwa Robert Kyagulanyi ne munne Francis Zaake,Matembe atabukidde minister w’eby’obulamu Jane Ruth Aceng eyasinziira ku ssengejjero ly’amawulire n’ategeeza nti eggwanga lirina obujjanjabi obumala obwali bwetaagibwa mu kujjanjaba ababaka bano nga talabawo nsonga lwaki baali baagala okutwalibwa ebunaayira nga buli kimu wano weekiri.Ono avudde mu mbeera n’agamba nti obanga eggwanga lirina buli ekyetaagisa mu by’obujjanjabi talaba nsonga lwaki ba minister ab’eby’obulamu abo bennyini buli lwebalwalako batwalibwa bunaayira okujjanjabwa.

 

ABAZADDE BASABIDDWA OBUTAFUULA BAANA BUGOMA

Okutulugunyizibwa,okuboggolerwa ssaako okwolekezebwanga obukambwe ekiyitiridde mu buto kutataaganya enkula y’obwongo bw’omwana nga ne bwababeera akuze n’omwetegereza nnyo omulabamu ekimubulako.

Bwayogeddeko n’omusasi waffe,Omu ku ba Nnakazadde b’eggwanga Omumbejja Nakamanya Sarah kati alera bazzukulube ba Nnakabirye ategeezezza nti omwana bwakambuwalirwa ennyo akuliramu nnyo okwetya n’obutekkiririzaamu ekimuviirako oluusi okulemererwa okubaako kyayiga ob’oluusi ne kyakola ng’asuubira buli kadde kunenyezebwa kwokka.

Ono agamba nti abazadde basaanidde okulaga abaana omukwano ogw’ekigero baleme kubakambuwalira nnyo n’okubabonereza ennyo wabula ate baleme kubaleka kukula nnagalaale,babakangavvulenga wekiba kyetaagisiza.Omwana omu ku buli baana basatu ab’obulenzi ne bannyinaabwe ab’obuwala be batulugunyizibwa mu maka n’okusingira ddala bakazibaggya ba ba nnyaabwe.

ABATTA MAGARA BAKYAKALIRIRWA

Omulamuzi w’eddaala erisooka mu kkooti ya Buganda Road wano mu Kampala Robert Mukanza ayongezzaayo okuwulira omusango gw’abantu omwenda abagambibwa okuwamba n’okutta omuwala Suzan Magara.Kino kiddiridde akuliddemu oluuyi oluwaabi Patricia Cingitho okusaba bongerweyo obudde olw’okunonyereza okukyagenda mu maaso.

Kinajjukirwa nti ng’ennaku z’omwezi 15th omwezi ogw’Omunaana omulamuzi y’omu yagoba okusaba kw’abavunaanibwa bano okw’okwongerayo ensonga za kyebayita okutulugunyizibwa mu kitongole ekikola ku nsonga z’abatulugunyiziddwa.Puliida waabwe Abdul Hakim Lubega ye yali atadde embuga okwemulugunya kw’abavunaanwa bano ng’agamba nti ab’eby’okwerinda baabatulugunyiriza mu buduukulu.